ສະຖານທີ່ແຫຼ່ງທ່ອງທ່ຽວ

            1.ຖ້ຳຈອມອອງ
          

  

ຖ້ຳຈອມອອງນີ້ ໄດ້ຄົ້ນພົບໃນປີ ຄສ 2005 ແລະ ເປີດບໍລິການປີ ຄສ 2007 ເຊິ່ງຊື່ຖໍ້າຈອມອອງ ແມ່ນເອີ້ນຕາມຊື່ຂອງບ້ານ, ປະຊາຊົນທ້ອງຖິ່ນເຄີຍເອີ້ນຊື່ຖ້ຳນີ້ໃນເມື່ອກ່ອນວ່າ ຖ້ຳເຈຍ ຫຼື ຖ້ຳຂີ້ເຈຍ ຍ້ອນວ່າສະໄໝກ່ອນ ມີໂຕເຈຍມາອາໄສຢູ່ເປັນຈຳນວນຫຼວງຫຼາຍ, ປະຊາຊົນເຂດຈອມອອງ ໄດ້ພາກັນຂຸດເອົາຂີ້ໂຕເຈຍຢູ່ໃນຖ້ຳມາເຮັດໝື້ປືນແກັບ ດັ່ງນັ້ນ, ປະຊາຊົນເຂດຈອມອອງ ຈຶ່ງໄດ້ພາກັນເອີ້ນຊື່ຂອງຖ້ຳນີ້ວ່າ ຖ້ຳເຈຍ ຫຼື ຖ້ຳຂີ້ເຈຍ ແຕ່ທາງພະແນກທ່ອງທ່ຽວໄດ້ໂຄສະນາໃຫ້ເອີ້ນຊື່ວ່າ ຖ້ຳຈອມອອງ ຕາມຊື່ຂອງບ້ານ ຈົນເຖິງປັດຈຸບັນນີ້.
ບ້ານຈອມອອງອີກປະຫວັດໜຶ່ງທີ່ເອີ້ນວ່າ ຈອມອອງ ຍ້ອນວ່າຄຳວ່າ “ ຈອມ ’’ ເປັນພາສາກຶມມຸ ເຊິ່ງແປວ່າ ຕິດຕາມໄປ, ນຳກົ້ນໄປ, ສ່ວນຄຳວ່າ “ ອອງ ” ແປວ່າ ໂຕຕໍ່ດິນ ໃນສະໄໝກ່ອນປະຊາຊົນເມືອງນາໝໍ້ ໄດ້ໄປຄ້ອງຕໍ່ ຫຼື ຫາເອົາຮັງໂຕຕໍ່ ໂດຍໄດ້ເອົາຍວງຝ້າຍນ້ອຍໆອ່ອນໆມັດອາຫານໃສ່ຕີນໂຕຕໍ່ແລ້ວກໍ່ປ່ອຍຕໍ່ໃຫ້ບິນກັບໄປຫາຮັງ ແລ້ວປະຊາຊົນກໍນຳໂຕຕໍ່ນັ້ນໄປ ຈຶ່ງໄປພົບເຫັນເຂດພື້ນທີ່ດັ່ງກ່າວເປັນເຂດທີ່ອຸດົມສົມບູນເໝາະສົມໃນການຜະລິດກະສິກຳ ປູກຝັງ ແລະ ລ້ຽງສັດ ຕໍ່ມາຈຶ່ງພາກັນຍ້າຍຖິ່ນຖານມາຢູ່ບ້ານນີ້ແລ້ວຈິ່ງເອີ້ນວ່າ ບ້ານຈອມອອງ ຈົນເຖິງປັດຈຸບັນ.
ຖ້ຳຈອງອອງຕັ້ງຢູ່ບ້ານຈອມອອງ ເມືອງໄຊ ຫ່າງຈາກເທດສະບານ ເມືອງໄຊ 45 ກິໂລແມັດ ໄປທາງແຂວງອຸດົມໄຊ  24 ກິໂລແມັດ ເປັນທາງປູຍາງ ແຍກເຂົ້າເໜືອບ້ານ ນ້ຳບໍຕາໄກ ປະມານ 21 ກິໂລແມັດ ເປັນທາງດີນແດງ ອັດແໜ້ນ ຈາກບ້ານຈອມອອງສາມາດເຂົ້າເຖິງໄດ້ດ້ວຍ 2 ທາງຄື: ຍ່າງລັດແຕ່ບ້ານຜ່ານທົ່ງນາໄປຫາຖໍ້າ 2 ກິໂລແມັດ ແລະ ທາງລົດເຂົ້າຮອດ( ທາງດິນແດງ) ຖ້ຳຈອມອອງຕັ້ງຢູ່ຫ່າງຈາກບ້ານຈອມອອງປະມານ 3 ກິໂລແມັດ, ເປັນເສັ້ນທາງລົດສາມາດແລນເຂົ້າເຖິງບໍລິເວນຖ້ຳ ເປັນຖ້ຳໃຫຍ່, ຍາວ ແລະ ສວຍງາມທີ່ສຸດຂອງແຂວງອຸດົມໄຊເຊິ່ງປະກອບດ້ວຍລະບົບນິເວດທຳມະຊາດທີ່ອັດສະຈັນ, ມີຫຼາຍຊ່ອງທາງເຂົ້າ-ອອກພາຍໃນຖ້ຳ ປະມານ 16 ກວ່າກິໂລແມັດ, ຄວາມກວ້າງ ປະມານ 15 – 50 ແມັດແລະຄວາມສູງປະມານ 25-100 ແມັດ. ຢູ່ໃນຖ້ຳບາງບ່ອນມີສາຍນ້ຳໄຫຼຜ່ານ, ມີນົມຜາ, ຫີນຍ້ອຍ ທີ່ມີລວດລາຍສວຍງາມ,ຫີນແກ້ວເປັນສີຂາວເຫຼື້ອມຄືກັບເພັດພອຍເປັນກ້ອນໃຫຍ່ປະດັບປະດາຫ້ອຍຢູ່ຕາມຝາຫີນຄືກັບດອກໄຟປະດັບຢ່າງສວຍງາມ. ຢູ່ໃນຖ້ຳຍັງເປັນລັກສະນະເດີມທີ່ຍັງບໍ່ໄດ້ຮັບການດັດແປງແຕ່ຢ່າງໃດ. ຖ້ຳນີ້ໄດ້ຜ່ານການສຳຫຼວດຂອງນັກວິທະສາດ ຈາກສະຫະພັນຢູໂຣບໃນປີ 2009 ແລະປີ 2010 ໄດ້ສຳຫຼວດ 4 ປີ ເປັນຖ້ຳໃໝ່ລະດັບຊາດ ASEAN ແລະ ລະດັບໂລກ ປະຈຸບັນລັດຖະບານແຫ່ງ ສປປ ລາວ ໄດ້ຮັບທຶນຈາກທະນາຄານພັດທະນາອາຊີ ADB ໃຫ້ທືນຊ່ວຍເຫຼືອ ເພື່ອພັດທະນາເສັ້ນທາງ ແລະ ສິ່ງອຳນວຍຄວາມສະດວກຕ່າງໆ.

2 .ປ່າຫີນ ເມືອງຮຸນ ແຂວງ ອຸດົມໄຊ

ປ່າຫີນ ເປັນລານຫີນກວ້າງຢູ່ໃນເຂດພື້ນທີ່ເມືອງຮຸນ ແຂວງອຸດົມໄຊ ຫຼາຍຄົນທີ່ໄດ້ໄປເຫັນ ເວົ້າເປັນສຽງດຽວກັນວ່າ: ຖ້າຫັນເອົາເຂດນີ້ພັດທະນາໃຫ້ກາຍເປັນເຂດອຸທິຍານປ່າຫີນງາມ ເພື່ອດຶງດູດນັກທ່ອງທ່ຽວ ແລະ ຍົກໃຫ້ເປັນສະຖານທີ່ທ່ອງທ່ຽວທາງທຳມະຊາດຂອງເມືອງຮຸນ ກໍ່ຄື ແຂວງອຸດົມໄຊ ຈະສາມາດດຶງດູດນັກທ່ອງທ່ຽວໄດ້ເປັນຈຳນວນບໍ່ໜ້ອຍ.
ລານຫີນທີ່ກວ້າງຂວາງເກີດຈາກການກັດເຊາະເນື້ອດິນ ແລະ ຫີນ ໃນສ່ວນທີ່ຈັບໂຕກັນ ຢ່າງເບົາບາງຫຼຸດອອກໄປ ຫຼາຍເດືອນຫຼາຍປີ ຈຶ່ງເຮັດໃຫ້ເກີດໂຂດຫີນທີ່ມີຮູບຮ່າງລັກສະນະແຕກຕ່າງກັນ ເບິ່ງແລ້ວມີຄວາມງົດງາມ ແລະ ໜ້າອັດສະຈັນ, ໃນປ່າຫີນປະກອບດ້ວຍຕົ້ນໄມ້ທີ່ແຕກຕ່າງກັນໄປ ຕາມສະພາບພື້ນທີ່ ແລະ ລະດັບຄວາມສູງ.

3.ນ້ຳກັດຢໍລະປ່າ

ນ້ຳຕົກຕາດນ້ຳ ກັດເມືອງໄຊຈະເປັນອີກແຫລ່ງທ່ອງທ່ຽວຫນຶ່ງທີ່ຈະໄດ້ຮັບການພັດທະນາ ແລະ ຄຸ້ມຄອງການທ່ອງທ່ຽວຢ່າງເປັນລະບົບນັບແຕ່ນີ້ຮອດປີ 2015 ເຊິ່ງຈະໄດ້ມີການປັບ ປຸງ ແລະ ກຳນົດບຸລິມະສິດເຂດພື້ນທີ່ອະນຸລັກທັງສ້າງສິ່ງອຳນວຍຄວາມສະດວກບາງສ່ວນໃຫ້ແທດ ເຫມາະໂດຍຈະຮັກສາສິ່ງແວດລ້ອມໃນບໍລິເວນຕາດນ້ຳກັດໄວ້ຄືເກົ່າ. ນ້ຳຕົກຕາດນ້ຳ ກັດເປັນຕາດທີ່ມີຄວາມງົດງາມແຫ່ງຫນຶ່ງຢູ່ໃນແຂວງອຸດົມໄຊຫ່າງຈາກເທດສະບານແຂວງປະມານ 20 ກິໂລແມັດ ຢູ່ເຂດບ້ານກັດ ແລະ ບ້ານແຟນເມືອງໄຊ ນອນຢູ່ໃນເຂດອະນຸລັກຫົວ ນ້ຳກັດ ມີເນື້ອທີ່ 19 ພັນ 700 ເຮັກຕາໃນແຕ່ລະປີຈະມີນັກທ່ອງທ່ຽວເຂົ້າມາຫລາຍກວ່າ 20% ຂອງນັກທ່ອງທ່ຽວທັງຫມົດທີ່ມາທ່ຽວຊົມເມືອງໄຊເນື່ອງຈາກສະຖານທີ່ແຫ່ງນີ້ຍັງມີທຳມະ ຊາດອັນອຸດົມສົມບູນ ແລະ ສວຍງາມກົມກືນກັບນ້ຳຕົກຕາດທີ່ໂອບລ້ອມດ້ວຍທຳມະຊາດປ່າໄມ້ອາຍຸນັບຮ້ອຍປີ.
ຜົນຈາກການທ່ອງທ່ຽວຈິ່ງເຮັດໃຫ້ປະຊາຊົນເຂດບ້ານໃກ້ຄຽງມີລາຍຮັບຈາກການຂາຍ ເຄື່ອງຫັດຖະກຳພື້ນເມືອງຂອງເຜົ່າ ແລະ ການບໍລິການອື່ນໆແກ່ນັກທ່ອງທ່ຽວ.
ແຕ່ນີ້ຮອດ 2015 ອົງການທ່ອງທ່ຽວແຫ່ງຊາດ ແລະ ພະແນກທ່ອງທ່ຽວແຂວງອຸດົມໄຊຈະພັດທະນາຕາດນ້ຳກັດໃຫ້ກາຍເປັນ 1 ໃນ 3 ຂອງສະຖານທີ່ທ່ອງທ່ຽວທີ່ມີຊື່ສຽງໃນແຂວງ ອຸດົມໄຊ ໂດຍຈະສ້າງກິດຈະກຳການທ່ອງທ່ຽວແບບອະນຸລັກ ດ້ວຍການປະສານສົມທົບກັບພາກເອກະຊົນ ແລະ ປະຊາຊົນໃນທ້ອງຖິ່ນໃກ້ຄຽງພັດທະນາດ້ານການຕະຫລາດທີ່ເນັ້ນໃສ່ໂຄ ສະນາຕາດນ້ຳກັດ, ການພັດທະນາຕາດນ້ຳກັດຈະເປັນການອະນຸລັກເຂດອ່າງໂຕ່ງນ້ຳກັດ ເຊິ່ງເປັນແຫລ່ງຊັບພະຍາກອນອັນຕົ້ນຕໍຂອງການພັດທະນາການທ່ອງທ່ຽວ ໃນແຂວງອັນເປັນ ການປະກອບສ່ວນເຂົ້າໃນການຫລຸດຜ່ອນຄວາມທຸກຍາກສ້າງວຽກເຮັດງານທຳໃຫ້ແກ່ປະຊາຊົນໃນທ້ອງຖິ່ນ ໂດຍສະເພາະແມ່ນຄອບຄົວທີ່ທຸກຍາກຢູ່ບ້ານແຟນໂດຍຈະສ້າງໃຫ້ປະຊາຊົນ ເຂົ້າຮ່ວມກິດຈະກຳການທ່ອງທ່ຽວ ແລະ ຄຸ້ມຄອງສະຖານທີ່ທ່ອງທ່ຽວໃຫ້ມີຄວາມຍືນຍົງ ແລະ ເປັນແຫລ່ງລາຍຮັບດ້ານການທ່ອງທ່ຽວຂອງແຂວງອຸດົມໄຊໃນອະນາຄົດ

4 . ວັດພະເຈົ້າສິງຄຳ

ວັດພະເຈົ້າສິງຄຳ

   ວັດພະເຈົ້າສິງຄຳ ຕັ້ງຢູ່ບ້ານສາມັກຄີໄຊ ຫ່າງຈາກເທດສະ ບານເມືອງຫຼາປະມານ 9 ກິໂລແມັດ, ທາງຍ່າງຈາກເສັ້ນທາງຢາງຂຶ້ນໄປຫາຖ້ຳ 4 ກິໂລ ແມັດ. ເປັນຖ້ຳຂະໜາດນ້ອຍ, ມີຄວາມກວ້າງ ປະມານ 8 ແມັດ, ມີຄວາມສູງປະມານ 6 ແມັດ ແລະ ມີຄວາມຍາວປະມານ 20 ແມັດ, ເປັນບ່ອນປະ ດິດສະຖານໄວ້ພະເຈົ້າສິງຄຳ ໃນເມື່ອກ່ອນ (ສະໄໝປາງສົງຄາມ) ແລະ ປະກອບດ້ວຍທິວທັດທຳມະຊາດ ທີ່ສວຍສົດງົດງາມ ເໝາະສົມກັບການ ໄປຍ່າງປ່າສຶກສາຊີວະນາໆພັນ ແລະ ກິນເຂົ້າປ່າ ພ້ອມກັບການໄຫວ້ພະເຈົ້າຢູ່ ໃນຖ້ຳດັ່ງກ່າວນີ້ ແລະ ໄດ້ຕິດພັນກັບວົງຈອນການເດີນປ່າບ້ານຕະນອງປໍ ແລະ ຖ້ຳຫຼວງ. ຕາມການບອກເລົ່າຂອງຊາວບ້ານສາມັກຄີໄຊ ຊື່ເດີມຂອງຖ້ຳເອີ້ນວ່າ ຖ້ຳນ້ຳອອກຮູ ຕັ້ງແຕ່ເອົາພະເຈົ້າສິງຄຳ ມາປະດິດສະຖານໄວ້ທີ່ນີ້ ໃນສະໄໝສົງຄາມ ໂລກຄັ້ງທີ່ສອງ ເປັນເວລາ 20 ກວ່າປີ ຈຶ່ງໄດ້ປ່ຽນຊື່ໃໝ່ຂອງຖ້ຳ ຕາມພະເຈົ້າສິງຄຳ ຈົນເຖິງທຸກວັນນີ້. ທຸກໆປີ ຊາວບ້ານສາມັກຄີໄຊ ໄດ້ຈັດງານບຸນ ສະເຫຼີມສະຫຼອງຖ້ຳ ໃນເທດສະການປີໃໝ່ລາວ ແລະ ກາບໄຫວ້ບູຊາ. ເຊິ່ງບ້ານທີ່ເປັນເຈົ້າຂອງ ຜູ້ທີ່ເອົາພະເຈົ້າສິງຄຳ ຂຶ້ນມາຈາກນ້ຳພາກ ຢູ່ບ້ານຫາດນາງ ເມືອງຂວາ ແຂວງຜົ້ງສາລີ ມາປະດິດສະຖານ ໄວ້ຢູ່ວັດກາງ (ວັດພະເຈົ້າສິງຄຳໃນປະຈຸບັນ) ທຸກໆປີ ກ່ອນເອົາພະລົງຫົດສົງ ຕ້ອງແມ່ນຊາວບ້ານ ສາມັກຄີໄຊ ລົງຫົດສົງກ່ອນແລ້ວ ຈຶ່ງແມ່ນຊາວພຸດທະສາສະນິກະຊົນທົ່ວໄປ ຈຶ່ງຫົດສົງໄດ້ຕາມລຳດັບ ຕາມການເຊື່ອຖື ຂອງຄົນທ້ອງຖິ່ນ. ດ້ວຍເຫດນີ້ ຄົນຊົນເຜົ່າກຶມມຸ ໃນຂົງເຂດນີ້ ຈຶ່ງພາກັນນັບຖື ສາດສະໜາພຸດ ຢ່າງເຄັ່ງຄັດ ຄືກັບເຜົ່າລາວລຸ່ມ.

5.  ນ້ຳຕົກຕາດຕະແລ ເມືອງຮຸນ ແຂວງ ອຸດົມໄຊ

  ແຂວງ ອຸດົມໄຊ ເປັນອີກແຂວງໜຶ່ງຂອງລາວທີ່ມີສະຖານທີ່ທ່ອງທ່ຽວຫຼາຍໆແຫ່ງທີ່ມີຄວາມສວຍງາມ ແລະ ມື້ນີ້ພວກເຮົາຂໍນຳສະເໜີອີກແຫລ່ງທ່ອງທ່ຽວໜຶ່ງທີ່ໜ້າສົນໃຈ

“ນໍ້າຕົກຕາດຕະແລ” ເມືອງຮຸນ ແຂວງອຸດົມໄຊ ເມືອງແຫ່ງມົນສະເໜ่ ແລະ ຄວາມສວຍງາມຂອງນ້ຳຕົກຕາດ, ນໍ້າຕົກຕາດແຫ່ງນີ້ແບ່ງອອກເປັນຫລາຍຊັ້ນໆ ເໝືອນຂັ້ນໄດມີລັກສະນະຄ້າຍຄືກັນນໍ້າຕົກຕາດກວາງຊີ ແລະ ຕາດແສ້ ຫລວງພະບາງ ແຕ່ທີ່ຈິງແລ້ວນີ້ແມ່ນ “ນ້ຳຕົກຕາດຕະແລ”

ດ້ວຍບັນຍາກາດທີ່ເຕັມໄປດ້ວຍຄວາມຊຸ່ມຊື່ນຂອງສາຍນ້ຳ, ປ່າດົງຂຽວສົດງົດງາມມີຕົ້ນໄມ້ນ້ອຍໃຫຍ່ສັບປົນກັນທົ່ວທັງປ່າ ປະກອບກັບສຽງນ້ຳຕົກທີ່ໄຫລຈາກທີ່ສູງກະທົບໃສ່ຖານຫີນສຽງຄ້າຍກັນກັບຫ່າຝົນເມັດໃຫຍ່ປົນພາຍຸລົມແຮງ ມັນເຮັດໃຫ້ເຮົາຮູ້ສຶກຊຸ່ມຊືນທັງກາຍທັງໃຈແບບບັນຍາຍບໍ່ຖືກ ຄັ້ງໜຶ່ງໃນຊີວິດທ່ານຄວນມາສຳພັດຄວາມຮູ້ສຶກແບບນີ້ດ້ວຍຕົນເອງ.

6. ຖ້ຳກູດ ເມືອງ ງາ ແຂວງ ອຸດົມໄຊ

       ຖ້ຳກູດຕັ້ງຢູ່ບ້ານຫ້ວຍສະຫຼາກ ເມືອງງາ ຫ່າງຈາກເທດສະບານເມືອງງາປະມານ 42 ກິໂລແມັດ,ຫ່າງຈາກບ້ານປະມານ 4 ກິໂລແມັດ.ສະພາບການເຂົ້າເຖິງເປັນທາງດິນແດງ,ລັກສະນະແລະທ່າແຮງຖ້ຳດັງກ່າວມີຄວາມກ້ວາງ 3-5​ແມັດ,ຍາວປະມານ 200 ແມັດ,ມີຄວາມສວຍງາມ,ດ້ານນອກມີພູຜາຕັ້ງອ້ອມຮອບ,ມີປ່າໄມີຕືບໜາ.ເໜາະແກ່ການໄປພັກຜ່ອນ
   ຖ້ຳນີ້ປະຊາຊົນຄົ້ນພົບ ຍ້ອນໄປລ່າເນື້ອເລີຍໄປພົບຖ້ຳດັງກ່າວ ແຕ່ບໍ່ຮູ້ຈະໃສ່ຊື່ແນວໃດ ປະຊາຊົນແຖວນັ້ນ ຈືງພາກັນໃສ່ຊື່ວ່າ"ຖ້ຳຫ້ວຍກູດ"ຍ້ອນວ່າຖ້ຳດັງກ່າວຕັ້ງຢູ່ໃກ້ກັບຫ້ວຍກູດຈືງໃສ່ຊື່ວ່າຖ້ຳຫ້ວຍກູດຈົນມາຮອດປັດຈຸບັນນີ້.